ຊາຈອກໜຶ່ງ, ຊຶມຊັບສະເໜ່ແຫ່ງການເປີດກວ້າງຂອງແຂວງຢຸນນານ_ວັດທະນະທຳ-ທ່ອງທ່ຽວ

ຊາຈອກໜຶ່ງ, ຊຶມຊັບສະເໜ່ແຫ່ງການເປີດກວ້າງຂອງແຂວງຢຸນນານ

ມາຈາກ:ສຳນັກຂ່າວສານຊິນຮວາ

ນັກທ່ອງທ່ຽວຕ່າງປະເທດຊີມລົດຊາດຊາຢຸນນານ

（ສະບາຍດີ ນັກຂ່າວ ເກສອນ）ໃນໂຊນວາງສະແດງຜະລິດຕະພັນຊາ ຂອງງານວາງສະແດງສິນຄ້າຈີນ-ອາຊີໃຕ້ ຄັ້ງທີ 10 ແມ່ນມີແຂກທັງພາຍໃນ ແລະ ຕ່າງປະເທດ ເຂົ້າມາຢ້ຽມຢາມຢ່າງຫຼວງຫຼາຍ, ກິ່ນຫອມອົບອວນຂອງຊາ ໄດ້ກາຍເປັນຂົວຕໍ່ ໃນການຊຸກຍູ້ການແລກປ່ຽນເສດຖະກິດ-ການຄ້າ ລະຫວ່າງຈີນ ແລະ ຕ່າງປະເທດ, ພ້ອມທັງສະແດງໃຫ້ເຫັນເຖິງ ສະເໜ່ອັນເອກະລັກພິເສດແຫ່ງການເປີດກວ້າງສູ່ໂລກພາຍນອກ ຂອງແຂວງຢຸນນານ.

ໃນງານວາງສະແດງຄັ້ງນີ້, ຜະລິດຕະພັນຊາທີ່ມີເອກະລັກເຊັ່ນ: ຊາພູເອີ, ຊາຕຽນຮົງ ແລະ ຊາຂາວ ໄດ້ນຳມາວາງສະແດງຢ່າງໂດດເດັ່ນ, ເຄື່ອງດື່ມຊາສະໄໝໃໝ່ ເຕັກນິກການປະສົມຊາ ແລະ ຂະບວນການໝັກຊາອັນປານີດ ໄດ້ດຶງດູດຄວາມສົນໃຈຈາກຜູ້ເຂົ້າຊົມ ຈົນຕ້ອງຢຸດຊົມຢ່າງບໍ່ຂາດສາຍ. ຊາແບບດັ້ງເດີມ ແລະ ຜະລິດຕະພັນນະວັດຕະກຳ ໄດ້ເສີມສ້າງຄຸນຄ່າໃຫ້ແກ່ກັນ ແລະ ກັນ, ກາຍເປັນລະບົບຜະລິດຕະພັນທີ່ຫຼາກຫຼາຍ ແລະ ຄົບວົງຈອນ. ໃນຂະນະດຽວກັນ, ຊາຈາກອາຊີໃຕ້ ແລະ ອາຊີຕາເວັນອອກສ່ຽງໃຕ້ ກໍໄດ້ນຳມາຮ່ວງານໃນໃນງານວາງສະແດງສິນຄ້າຈີນ-ອາຊີໃຕ້ ຄັ້ງນີ້ເຊັ່ນກັນ.

ໃນຖານະເປັນປ່ອງຢ້ຽມສຳຄັນ ໃນການເຊື່ອມໂຍງການແລກປ່ຽນດ້ານເສດຖະກິດ-ການຄ້າ ແລະ ວັດທະນະທຳ ລະຫວ່າງ ຈີນ ແລະ ບັນດາປະເທດໃນພາກພື້ນອາຊີໃຕ້, ງານວາງສະແດງສິນຄ້າຈີນ-ອາຊີໃຕ້ ໄດ້ສ້າງເວທີອັນກວ້າງໃຫຍ່ ໃຫ້ແກ່ຊາຂອງແຂວງຢຸນນານ ໃນການກ້າວສູ່ຕະຫຼາດສາກົນ.ຕະຫຼອດຫຼາຍປີຜ່ານມາ, ບັນດາວິສາຫະກິດຊາທ້ອງຖິ່ນຂອງແຂວງຢຸນນານ ໄດ້ອາໄສເວທີສາກົນແຫ່ງນີ້ ເພື່ອສືບຕໍ່ຂະຫຍາຍຕະຫຼາດໃນພາກພື້ນອາຊີໃຕ້.ໃນງານວາງສະແດງ, ບັນດານັກທຸລະກິດຊາທັງຈາກຈີນ ແລະ ຕ່າງປະເທດ ໄດ້ນຳໃຊ້ຊາເປັນພໍ່ສື່ ແລະ ໃນການຜູກມິດໄມຕີ ແລະ ສ້າງມິດຕະພາບ. ວັດທະນະທຳຊາ ແລະ ອຸດສາຫະກຳຊາ ໄດ້ຖືກປະສົມປະສານກັນ, ເຮັດໃຫ້ຊາຂອງແຂວງຢຸນນານ ຄ່ອຍໆກ້າວອອກຈາກເຂດພູດອຍ ສູ່ຕະຫຼາດໂລກ, ພ້ອມທັງກາຍເປັນສັກຂີພິຍານອັນມີຊີວິດຊີວາ ຂອງການຮ່ວມມືສອງຝ່າຍ ທີ່ຕ່າງຝ່າຍຕ່າງໄດ້ຮັບຜົນປະໂຫຍດ.